شعر محلی از شاعر جوان آقای مجتبی بهروزی بالا جاده کودکوی

”یادش بخیر قدیما”

قدیـــــــمای همـــدلی یادش بخیـــــــــــر
صدق و صِفا و یکدلی یادش بخیر

یک صِفای دیگه داشته اون موقع
چوُ خانــه،سَر سِفالی یادش بخیر

عَییدِ ماه خانــه ها نوُ نِوار بیِه
دیوارای زردِ گِلی یادش بخیر

یک دَر اِتاقِ دِلِه هَف هَشتایـی
خواتِمی پَلی پَلی یادش بخیر

فرش اَمِه لَمه و جِل گِلیج بیِه
نَدیمی رنگِ قالی یادش بخیر

همــــه خاش حیاطِ دِلِه داشتِنِه
طویله و مِرغ کالی یادش بخیر

کِلِه سَـــــــر پِلای بِک و بو بـیِـــــــه
سیاه دِق و لاغِلی یادش بخیر

زَنگ بَزِه مِرسِ چاره قَلی بـیِـــه
قَلیچی،مِرسِ قَلی یادش بخیر

مَشتوُفِه و مِرسکِلا و بادیِه
سِماوارِ زِغالی یادش بخیر

فِسِنجان و کَپور کَله،ماش پَتی
غِــــذاهای محـلــی یادش بخیـــــر

اَربابِ سِفرِه غِذایِ رَنگ به رَنگ
رَعیِت ها نوُنِ خالی یادش بخیر

تابستان وقتی هِوا سوُزانیِه
دِرازنـو و دِکالی یادش بخیر

پایــیــــــزِ مــــــــاه اِنـبــارِ دِلِـــــــه پِر بیِــــه
گوُرس و اَرزِن و شالی یادش بخیر

زمسـتــــان هیـمِهٔ تَش صِفا داشته
توُسکا دار و اَنجیلی یادش بخیر

یَلدا شوُ فامیلا دورِ هم بینِه
قدیمایِ فامیلی یادش بخیر

موقع شوُنیشت با هم خوانینِه
اَمیـــری و کَتـــــولی یادش بخیر

شَب چَرِه کاندِس و وَلِک داشتِمی
لَــبلَبو و تِـــــرش هَـــلــی یادش بخیر

عِیدِ قُربان بیِه وقتی،مال دارا
کاشتِنِه نَـــــــر تِقالی یادش بخیر

گـوک زا وِه خــال و چَــــردِه یـاردِمــی
موُزی و اِزدارِ وَلگ و وَلوَلی یادش بخیر

جانِکا رِه اینقَدِر شِمیش زوُنِه
تا بَواشِــــــه اِزالــی یادش بخیر

همـــــــــهٔ حـیــــاطِ دِلِـــــه دَهیه
چیندِکا،غاز و بِلی یادش بخیر

کالِچَــــــرم بِه جـــای چکمه پوُشتِمـــــی
بوُسِستِه کوُش،لِنگِ تَلی یادش بخیر

لِنگ اَگِــر چَــلی بَیـیـوُ،چَــلی وَند
لِنگِ رِه وَستِه چَلی یادش بخیر

کِــرباس و کـوُدَری و بِشـوُر بِپوُش
خیاط و چرخ هِندِلی یادش بخیر

جِوانا عاروُسیا خوشحال و شاد
خوانینِه گَــلــی گَــلـــی یادش بخیر

پنبه وِجین کاردِمی،اَم دوُر و وَر
لَــلِـــمبــاز و بـاپِــلــــــی یادش بخیــــر

سُز اَگِـر بَـــروُتِــــووُن بِهـــــارِ ماه
پاییز ماهِ بی پولی یادش بخیر

هَــــر کاجِــــه به دَرِ بسته خاردِمـی
گُتِمی ذکرِ علی (ع) یادش بخیر

اَز قدیم دین دار و با خدا بینِه
طبقده یادش بخیــــــر